ភ្នំពេញ៖ នៅដើមឆ្នាំ២០២៥ វិនិយោគិនចិននៅតែបន្តឈរលំដាប់កំពូលជាវិនិយោគិនដែលបោះទុនវិនិយោគនៅកម្ពុជាច្រើនជាងគេ។ ជាក់ស្ដែងរយៈពេល ២ខែដំបូងនៃឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគចំនួន ១១២គម្រោង មានទុនវិនិយោគសរុបជាង ១ពាន់លានដុល្លារអាមេរិក ដោយក្នុងនោះ ប្រភពទុនមកពីប្រទេសចិនមានប្រមាណ៨០ភាគរយ ឬជាង៨០០លានដុល្លារអាមេរិកទៅហើយ ។

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) ក្នុងពិធីសម្ពោធមជ្ឈមណ្ឌលត្រួតពិនិត្យឧបករណ៍ពិសេសរបស់ក្រុមហ៊ុន តេ ហ្សង ស៊ីប៉ី ជានស៊ី យ៉ានជីវ យ័ន នៅព្រឹកថ្ងៃទី៣១ ខែមីនា ឆ្នាំ២០២៥ បានមានប្រសាសន៍ថា៖ក្នុងឆ្នាំ២០២៤កន្លងទៅ ក្រុមប្រឹក្សាអភិវឌ្ឍន៍កម្ពុជា(ក.អ.ក.) តាមរយៈគណៈកម្មាធិការវិនិយោគកម្ពុជា(គ.វ.ក.)បានអនុម័ត គម្រោង វិនិយោគទាំងក្នុង និងក្រៅតំបន់សេដ្ឋកិច្ចពិសេសសរុបចំនួន ៤១៤គម្រោង ក្នុងទំហំទុនវិនិយោគសរុបប្រមាណ ៦,៩ប៊ីលានដុល្លារអាម៉េរិក។បើប្រៀបធៀបនឹងឆ្នាំ២០២៣ ចំនួនគម្រោងវិនិយោគមានការកើនឡើងប្រមាណ៥៤% រីឯទំហំទុនវិនិយោគមានការកើនឡើងប្រមាណ ៤០%។
លោកបានបញ្ជាក់ថា៖នេះជាលើកទី១ហើយ ដែល ក.អ.ក. បាន អនុម័តគម្រោងវិនិយោគ រហូតដល់ទៅជាង ៤០០គម្រោង ក្នុងរយៈពេលត្រឹម ១ឆ្នាំ។ ជាមួយគ្នានេះ ក្នុង រយៈពេល២ខែដើមឆ្នាំ២០២៥ ចំនួនគម្រោងវិនិយោគសរុបដែលត្រូវបានអនុម័តមានចំនួន១១២គម្រោងជាមួយនឹងទំហំទុនវិនិយោគប្រមាណ ១ប៊ីលានដុល្លារអាម៉េរិក។ ចំនួនគម្រោងវិនិយោគក្នុងរយៈពេល២ខែដើម ឆ្នាំ២០២៥នេះ គឺស្ទើរតែប្រហាក់ប្រហែលទៅនឹងចំនួនគម្រោងវិនិយោគដែល គ.វ.ក. អនុម័តក្នុងរយៈពេល មួយឆ្នាំនៃឆ្នាំ២០២១ គឺប្រមាណ ១៦៩ គម្រោង។

លោកលើកទឹកចិត្តដល់វិនិយោគិនទាំងអស់ បន្តចូលរួមផ្សព្វផ្សាយពីបទពិសោធន៍ល្អៗ និងជោគជ័យក្នុងការវិនិយោគនៅកម្ពុជា ទៅកាន់វិនិយោគិនផ្សេងៗទៀត ដើម្បីរួមចំណែកជាមួយរាជរដ្ឋាភិបាល ក្នុងការទាក់ទាញវិនិយោគមកកាន់តែច្រើនបន្ថែមទៀត ជាពិសេសក្រុមហ៊ុនចិន ខណៈក្នុងរយៈពេលជាង១០ឆ្នាំមកនេះ ក្រុមហ៊ុនវិនិយោគិនរបស់ចិន ដែលបានមកបោះទុនវិនិយោគនៅកម្ពុជា បានឈរនៅលំដាប់លេខ១ និងលេខ២ស្ទើតែជារៀងរាល់ឆ្នាំ។ ជាក់ស្តែងនៅក្នុងឆ្នាំ២០២៤ ទុនវិនិយោគសរុបទាំងអស់ដែលមកពីប្រទេសចិន មានប្រមាណជា៥០% នៃគម្រោងដែលបានអនុម័ត។
ជាមួយគ្នានេះ លោកបានលើកឡើងថា៖ការជ្រើរើសរបស់ក្រុមហ៊ុន តេ ហ្សង ស៊ីប៉ី ជានស៊ី យ៉ានជីវ យ័ន ក្នុងការវិនិយោគនិងបណ្តាក់ទុន ក្នុងការបង្កើតមជ្ឈមណ្ឌលត្រួតពិនិត្យ ឧបករណ៍ពិសេសនៅកម្ពុជា ដើម្បីផ្តល់សេវាត្រួតពិនិត្យឧបករណ៍ផ្សេងៗដូចជា ឡចំហាយ ធុងសម្ពាធ ជណ្តើរយន្ត គ្រឿងចក្រលើស្ទួចទម្ងន់ យានយន្តលើកស្ទូចទំនិញក្នុងរោងចក្រ រ៉ត់ជិះលេងកម្សាន្ត និងកន្រ្ទកខ្សែកាប គឺជាការជ្រើសរើសដ៏ត្រឹមត្រូវ។
លោកបានបន្ថែមថា៖ ការបង្កើតមជ្ឈមណ្ឌលនេះ គឺជាសមិទ្ធផលថ្មីមួយរបស់កម្ពុជា និងបានចូលរួមចំណែកជាមួយរាជរដ្ឋាភិបាល ក្នុងការរក្សាសុវត្ថិភាព និងអាយុជីវិតរបស់បងប្អូនប្រជាពលរដ្ឋ ដែលប្រើប្រាស់ឧបករណ៍ពិសេសទាំងនេះជាប្រចាំ។

លោក សាត សាមី រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងថា ក្រុមហ៊ុន តេ ហ្សង ស៊ីប៉ី ជានស៊ី យ៉ានជីវ យ័ន ក្នុងរយៈពេល១០ឆ្នាំនេះ បានចូលរួមចំណែកយ៉ាងច្រើនក្នុងការវិនិយោគិននៅកម្ពុជា ជាពិសេសក្នុងវិស័យឧស្សាហកម្ម និងបានចូលរួមចំណែកក្នុងការអភិវឌ្ឍន៍បច្ចេកវិទ្យា និងបច្ចេកទេសផ្សេងៗនៅកម្ពុជា។លោកបានជំរុញឱ្យក្រុមហ៊ុននេះបន្តសហការក៏ដូចជារៀបចំ បែបបទនិតិវិធី ក្នុងការបណ្តាក់ទុនវិនិយោគបន្ថែមទៀត៕